فضيحة الهلال(شعوذة ودجل)ولولاه لا يكون المريخ مغلوب2

استعرض الموضوع السابق استعرض الموضوع التالي اذهب الى الأسفل

فضيحة الهلال(شعوذة ودجل)ولولاه لا يكون المريخ مغلوب2

مُساهمة  zoelyed في السبت سبتمبر 19, 2009 6:29 am

الفاتح الصادق حامد:-
الرايح ليهو فوز بفتش عضلات الرجال ...
اول شئ لو كانت كورة الهلال دى بالكواديك ما كان الاهداف بتجى بالصواريخ زى دى حسب علم الكادودك من اهلو النجيريين بعدما فكوها فيهم ناس هاروت وماروت .. الاقوان المسحورة ديك بتجى كالاتى يا مستجد فى علم الكادوك .. مثلا يجى هوا يشيل الكورة ويدخلها الشبكة بصورة اى زول يشك فيها .
او الكورة ما تطلع من الدربكة بصورة تحير لعيبة الفريق الخصم وتبوظ اعصابهم .
الشئ التالت انه الفريق الخصم يشعر كل لاعبينه بفتور غريب وارجلهم بتبقى تقيلة واسأل ناسكم من السحر ... المتافيزيغيا راااقدة بتوريك الكلام دة
واشياء او خزعبلات زى دى ... الشئ الاخير انه الكادوك ما بشيلوه فى يد .. دائما تأثيره بيكون من على البعد بالريموت يا خبير .
تخريمة اخيرة ..
كل او جل السودانيين بلبسوا حجاب ( بغض النظر عن اختلافى معاه ) .. هل يعنى انهم بتاعين كواديك ؟
الحجاب حسب علمى انه من حاجات كتيرة مثلا للعين او السحر او الشعوذة المطلوقة ساااى دى او الحسد .. او اشياء اخرى ...
حاول فتش تبرير للهزيمة يكون منطقى وانصف لا بالعين البايظة لاعبى الهلال الذين ادوا مباراة تاريخية ودافعوا عن شعار فريقهم بجدية لا تخطئها العين ( ما العين المغبشة ) .
فريق الهلال ادخل المريخ مدرسة فى التكنيك الكروى يوم 11 سبتمبر وهزمه شر هزيمة واخرجه من البطولة الكبرى فى افريقيا .
المريخ بعيش خلل فنى وادارى واعلامى كبير يجب الالتفات اليه بدل ان تغضوا الابصار وتعيشوا فى سقف المرمى الخيالى .
لاقى تبرير اخر اخرج به الهزيمة النكراء من نفسك .. ورمضان كريم يا بتاع الكواديك

لامين عباس احمد:-
طيب دي ما شكوي جاااااااااهزة يا ناس الشكاوي ههه
انت عارف لو اشتكيتو الاتحاد الافريقي حيشوف قصة القون .. حيلقي عمر بخيت قلع الكورة من الدافي وداها سيف مساوي ومررها لي امبيلي وامبيلي اداها البرنس والبرنس لي عمر بخيت وعمر بخيت جوه الشبكة ... اها يا حبوب حيقولو ليكم وين ناسكم ليه ما قطعو الباصات دي كلها ؟؟؟ حتقولوا عشان الحجاب ؟؟؟ حتترفض الشكوي ويفتحو ليكم بلاغ ازعاج سلطات مختصة لأنو دي المرة التالتة ولا الرابعة ترفعو شكوي فالصو ...

الفاتح خليل الفكي:-
خلاص يا بتاعين الشكاوى نقول قون المعلم عمر بخيت ما محسوب بس قون ايفوسا كيف
ولا يكون المعلم عمر بخيت عمل ليهو نسخة من الحجاب والله حالتكم تحنن
حقيقة التلاتة حاره المره الجاية اعملوا كشف عن الحجابات

محمد البشرى الخضر:-

الحمد لله حمدا كثيرا
معقداني من زمان قصة انو محمد عادل هلالابي وكنت بتصبر شوية بإنو عمار آدم بوزن المعادلة بهناك
و اتجرست عديل لما عمار اعلن انسحابو
لكن الله دا ما كريم
رزقنا بي وصيفابي يعادل محمد عادل و عمار و آخرين مجتمعين
قوي يا ذا اليد والله
كيب إت أب

محمد ابراهيم قرض:-
ذو اليد ..
بصراحة كده مريخنا فضحنا و شرط عينا ..
يعني كل هذه الهزايم المتوالية بفعل
الكواديك ؟؟؟؟
مافي مبرر حتى ولو كانت كواديك
لأن جماعة المريخ واجب عليهم التحوط في هذه
"بمضادات الكواديك" طالما دخلت الكواديك
في حلبة المنافسة ..
أرجو أن يتعافى المريخ من كبوته
على الأقل احتراما لجمهوره العريض

معاوية المدير:-
: بس قون ايفوسا كيف


بصراحة كده...
حقيقة قون شواطين، الشغل
ده ما شُغُل نصآح!!!

انور التكينة:-


محمد عبد الماجد الصايم:-
شنو يا تكينة
عايش في ناقورنو كرباخ ولا شنو؟
حجاب .. ما شفت ليكـ حجاب قبل كــدا؟
أنزل السوق العربي دا وأرفع ضراعات الناس البتلقاها!
ود البشرى يا عمكـ
ياخ دا أخير منو محمد عادل .. تصدق!

ذواليد سليمان مصطفى:-
انور التكينة
عفيت عنك
ماقصرت
المفترض نرفع دعوى
فى الهلال
عشان الكادوك
يودوه المعمل الجنائي للفحص

ناجى أحمد البشير:-
ده معناه انه فريقكم تمام ورئيسكم تمام ومدربكم تمام ولاعبينكم تمام وتسجيلاتكم تمام وأعلامكم تمام
والكورة خانتكم والهلال غلبكم بالكواديك .. خلاص خليكم على كده .. وحتشوفوا حتصلوا وين ؟؟؟؟؟؟؟؟؟
زى ما قال جمهوركم بعد مباراة زيسكو ( الليق الليق )

رقم صفر:-

Quote: الحمد لله حمدا كثيرا

معقداني من زمان قصة انو محمد عادل هلالابي وكنت بتصبر شوية بإنو عمار آدم بوزن المعادلة بهناك
و اتجرست عديل لما عمار اعلن انسحابو
لكن الله دا ما كريم
رزقنا بي وصيفابي يعادل محمد عادل و عمار و آخرين مجتمعين

قوي يا ذا اليد والله
كيب إت أب


ود البشرى يوما ما سأعطيك اليوزر نيم بتاعي ، بس اضيف ، والله اشفقت علي ذو اليد هذا عدييل وبالسوداني
حنيت عليه ،،،،

Nasruddin Al Basheer:-

عليْ النعمة يا ذا اليد واللسان إنت إنسان لذيذ للحد البعيد..
والمريخاب بوجه عام ناس مبدعين وحقو يخلوا موضوع الكورة ده
ويحاولوا يستفيدوا من مقدراتهم الإبداعية الزي دي..
أمس في موقع كورة واحد مريخابي كان بينتقد في (سوء السلوك)
بتاع خليفة عشان ثبت الكورة بفردة مؤخرته، مع إنو قانون الكورة
نفسو ما بعاقب اللاعب على مثل هذه التثبيتة وبيعتبرها جزء من الجسم..
شفتو كيف؟.. الراجل اكتشف لينا إنو في سوء سلوك في الجعبات كمان..
ولو الاتحاد الأفريقي شاهد شريط المباراة دي وحركة خليفة العملها،
احتمال كبير المباراة دي تتعاد في الرد كاسل..
أرجو أن يبقى الموضوع ده سر بيناتنا نحن كسودانيين وا يطلع برة..

محمد عبد الماجد الصايم:-
نصر الدين
هسي الجاب الجعبات في الكادوكـ شنو؟
باق المــوز بس!

haroon diyab:-
ياذو اليد
سلام

Quote: فضحية الهلال(شعوذة ودجل)ولولاه لا يكون المريخ مغلوب



لن نبخس الهلالاب انتصارهم
لعب الهلال فاجاد واستحق النصر
ولم نقدم مايشفع لنا
فحلال لهم الاحتفاء بنصرهم
وعلينا ان نحاول ترتيب اوراقنا
ولندعهم يحتفلون .
كل الود

tmbis:-

عندي جدي (حســن) في البلد الله يرحمو ويغفر ليهو اتوفى قبل سنوات قريبه ..
القرود عامله ليهو حبس كبس في الجنينة مع المنقه ..
يا ذو اليد القرد بقرم المنقايه ويقطعه يرميها في الواطة يا يخليها في حتته .. حقاره قرود بس ..
جدي حسن الله يرحمو قال لي كنت بجيب ليهم مرسي بن المعلم الزناتي بالجردل .. ويختها ليهم تحت الشجرة .. الشفوت بعدما يضربو المنقه .. بجو نازلين .. للجردل ، يضربو الفيها النصيب .. ويطلعو الشجرة .. بعداك كل وحسب خفتو ؟؟ اسرع واحد فيهم بيمسك نار بيجي داقي الدلجه .. ويكون راح فيها ..
في واحدين كدا .. بعدما يضربو ويشيلو كفايتم .. بيشيلو معاهم الباقي في كيس .. ما كمان (دوخــه) بلاش .. هم دافيعن حاجة ..؟
ماكلين وشاربين ومتفسحين ..
كان في واحد بس .. من القرود دي مفتح خالص .. عارف ليك الشرك دا .. جدي الله يرحمو قال لي قدرما دردقت القرد دا ما قدرت ليهو ..
يللا قال لي القرد لما شاف المجموعة دي بتنزل تحت وتشرب من الجردل وتطلع فوق (تلغلغ) عرف الحاصل شنو وبقى يراغب .. وشكلو زعل من المرحوم شويتين كدا .. واحتمال كبير يكون قرد ملتزم .. أو بتاع (كواميد) وما ليهو في (المويات) دي .. ي احتمال يكون تاب عديل كدا ..
جدي الله يرحمو قال لي .. يوم الدغش نزلت البحــر (اتبرد) وختيت هدومي فوق (القيفه) والدنيا برد .. لما نزلت الموية .. لقيت القرد القبيل داك .. لامي ليهو مجموعة ارهابية .. وكل قرداَ فيها شايل ليهو عرق اخدر من شجر الغابة الكتير من غير تحديد نوعيتو .. لكن قال لي (مطارق) طايعة .. قال لي بعدما اتبردته .. وبقيت طالع .. قام القرد دا .. (صفر) صفارة طويلة .. بعد شوية القيفه كلها اتملت قرود بي (مطارق) .. واحد في القرود ديل قال لي شال العراقي والسروال حقاتي وطلع بيهم الشجرة .. بينما هاجمني القطيع بتاع القرود .. واخدت علقه صباحية عمري ما انساها ..
جدنا (قنص) لي القرد الكبير دا .. اتمكن منو بعد فترة .. بي طلقة من بندقيتو الخاتيها لليوم الأسود الزي دا .. هو في يوم اسود من يوم زي دا ..؟ تجي البحـر يدقوك وتطلع عريان ..؟
الشاهد في الموضوع .. يوم بصارع في جدي الله يرحمو .. وهو رجل كان .. دووود وقوي قمت مسكتو من يديو فوق .. في مكان سكين الضراع .. لقيت حزمة حجابات .. قمت طلعتها بتفحص فيها .. قمت تتخيل لقيت ليك شنو ..؟
تخيل لقيت (صبـاع) القرد الكبير مربوط مع .. حزمة الحجابات .. بعد أن قام بمعالجته بطريقة تحنيط عالية الجودة .. وعندها شرح لي مشكلتو مع القرد .. وكيف انو بيحتفظ بالاصبع دا كتميمة حظ ..
تخيل خاتي اصبع القرد .. مع الحجابات ..؟
جدي دا الله يرحمو .. إنت قايلو كان بيلعب في برشلونــة ..؟
والله اقوليك حاجـة ..؟
إنت زاتك حسع كان دقوك فتاشة .. تلقــاك شارب ليك تلاتة مصاحف .. وجردلين محاية .. وعندك حزام حجابات .. والله طيارة ما تقوم جمبك .. خليك من تجيب قون الساهلــة دي ..

ملحوظـــة..
إن شاء الله القصة بتاعت القرد دي يا ذو اليد تنفع معاك ..؟!
والله كل يوم بستغرب انـا ..
بكري بجيب لينا الناس دي من وين ..؟

omer osman:-

Quote: لن نبخس الهلالاب انتصارهم
لعب الهلال فاجاد واستحق النصر
ولم نقدم مايشفع لنا
فحلال لهم الاحتفاء بنصرهم
وعلينا ان نحاول ترتيب اوراقنا
ولندعهم يحتفلون .

كلام صاح ياهارون ....
لكن بيني وبينك والله في واحد من جمهور الهلال كان شايل ليهو ديك

haroon diyab:-
جنابو
كيييييييييييف.....؟
Quote: لكن بيني وبينك والله في واحد من جمهور الهلال كان شايل ليهو ديك
ديك الجن
هيييييييييي يكاااااااااا


ALGARADABI:-
: سوء سلوك في الجعبات
ود الجار عودو
ضرستنا ياخ

عبدالوهاب علي الحاج:-

Quote: إنت زاتك حسع كان دقوك فتاشة .. تلقــاك شارب ليك تلاتة مصاحف .. وجردلين محاية .. وعندك حزام حجابات .. والله طيارة ما تقوم جمبك .. خليك من تجيب قون الساهلــة دي ..
تمبس
اختشي
وهبة

هشام المجمر:-
كان الحجابات بتجيب الغلب كانت نيجريا اخدت كأس العالم

tmbis:-
: اختشي


وهبــة الأمنجي ..
عندي خالي في الدمازين الله يديهو الصحة والعافية .. كنت لما احب ارطب بمشي الدمازين .. خريف مبالغـه ومطر وصيد بري وبحري . يعني زي ما تقول كدا كنت بتاع حركات ..
المهم
فترة كدا مشيت وكان الخريف كالعادة شغال .. وبعدين في صيانـة في البيت .. عمليات بنيان .. ماسك الشغلانة دي ود عمتنا معلم خطير جدا .. جايب معاهو (طلبـة) من أولاد الهوسا المستقرين في الروصيرص .. ماشاء الله زي النحلة .. محير ليك ود عمتنا يكون طالع في السقالة .. يملئ ليهو (الطالوش ) قبال ما يكمل يلقاهو كابي ليهو (المونة) في السقالة جمبو .. بعدين ابشرك .. عمل ليك نفسيات لي ود عمتنا دا .. لما ود عمتنا دا يقطع .. بقوم بستلم (الطالوش) والمسطرين وبيشتغل هو .. يعني مسالة يقعد دي مافيشة .. بعدين بجازف ليك شوال الاسمنت دا في صفحتـو .. وبجرس ليك الخرسانة دي جرسة شديدة .. المهم كانو مشروعي الشباب ديل .. من الصباح بكون قاعد ليك معاهم .. لما يجي الفطور بمشي بظبط ليهم العضة .. واللياقات .. طبعا اسماك ولحوم البلد كان خيره وافر ..
يللا .. (الطلبـة) دا بجيب معاهـو .. (القدوقدو) في بستله .. دي كانت فقرة التحلية الرئيسية .. يعني بي صراحـة اخوك ضرب كمية (قدوقدو) في الدنيا دي .. تعرش ليها غرفتين خلف خلاف ..
اللذيذة شنـو..؟
جيت لقيت ليك ود عمتنا (مكوووم في الواطـة) وشابك ليك الولد .. شكيتك على الله كان عايز تقصر لي اجلي ..
رفعتو من الواااطـة وانا بضحك .. والطلبه بتاعو قاعد يضحك .. قلت ليهو الحصل شنو .. قال لي عاين عليك الله (النصيبة) دا النوعية دي قال لي ما بتموت بالساهل .. إلا يضبحوهو ..
قلت ليهو كيف ..؟
قال لي عليك النبي كدي قرب ليهو .. وخليهو يدخل يدو في الحيطة دي طبعا ما فهمت الحاصل شنو أنا .. قمت قربت ليهو قلت ليهو الحاصل شنو ..؟؟
قال لي :
( في حـاجة حــارة ) هنا
قلت ليهو وين ..؟
قام خته ايدو في الحيطة .. وانا جمبو .. ياعمك .. شحنتني ليك كهربـه من ايدو لمن راسي لفه
اتاريهو في سلك عريان في الحيطة السلك الداخل من العمود .. والشقي دا .. اثناء ما بيحفر قام السلك دا اتعرى .. وبقى واضح ومكشوف .. قام هبشو .. قال لي في حاجة حـاره هنـا ود عمتنا كملان من لحم الدنيا هبش الزول دا اثنا ما داك هبش السلك .. ولفختو ليك الكهربه رمتـو .. غايتو انا فيوزاتي كانت مظبوطـة .. يادوبك بس راسي لفه كدا ..
لكن زولك داك .. اكتفى بي انو قال يل في حاجة حارة هنـا
عليك الله عاين زي ناس في حاجة حاره هنـا دا .. كهربه طالعة من الخزان يقوليك في حاجة حاره هنـا
يوم جات ماشه عقرب كدا مسكه ليك والله حنيت على العقـرب .. محلات تودي شوكته دي غلبـه..
يعني زي آدم دا .. يا ذو اليد .. لا عندو علاقة بالكورة ولا بي مزمل أبو القاسم .. لكن بيحب حنـان بلوبلو مووت ..
يللا آدم دا .. اعتقد انو كان دقشتو عرية ما بتجيو حاجة .. غايتو إلا حاجة من الله كدا .. طالما كهربه ميتين وعشرين .. جايه من الخزان .. يقوليك في حاجة حاره هنـا دا ..
ديل (ببقوهـا) يا ذوالكف .. حريفين جدا تجي تشبكنا عمر بخيت لابس ليهو (أركبي) ..؟
عندي صاحبي امو عامله ليهو كمون اسود ورابطاهو في جلد ومرسلاهو ليهو من السودان .. ومعلقو في العربية بي تحت .. يعني معناته عربيتو دي بتجيب قوون برضو ..؟

عبدالكريم الامين احمد:-

Quote: بينما هاجمني القطيع بتاع القرود .. واخدت علقه صباحية عمري ما انساها ..

ويا ذو اليد
قووون زي بتاع عمر بخيت ده حرم لو الحجاب ده كتبو الفكي ( قوبي دا نيسا)# ما يخش...
(قوبي دا نيسا) ده الاسم الحركي لاشفت فكي في السودان نواحي مايرنو الشهيرة بموسكو


محمد عبد الماجد الصايم:-
: إنت زاتك حسع كان دقوك فتاشة .. تلقــاك شارب ليك تلاتة مصاحف .. وجردلين محاية .. وعندك حزام حجابات .. والله طيارة ما تقوم جمبك .. خليك من تجيب قون الساهلــة دي
باللاي الناس دي تقول أول مرة تشوف ليها حجاب!
يعني زي دا لو شاف الحجاب الحاجز إلا يقعوا بردلب!

أبوبكر أبوالقاسم:-
Quote: معقداني من زمان قصة انو محمد عادل هلالابي
صـــــــدقناك يا أبوى.
كيكــى :
ما داير ليك شئ من موسكـــــــــو ويكون جلده جديد زى الظاهر فى صورة التكينة ومطلى باللون الأحمر بتاع المراكيب.
بالمناسبة الناس اللعبوا كورة عارفين الخزعبلات دى بعملوا ليها شــــنو .... صحيح يا تمبس ؟


عبدالكريم الامين احمد:-

Quote: ما داير ليك شئ من موسكـــــــــو ويكون جلده جديد زى الظاهر فى صورة التكينة ومطلى باللون الأحمر بتاع المراكيب.


بالحيل يا ابوبكر لو لقيت واحد بتاع (كركبة اسفيرية) ما باباهو

عندي ولد اهلي زي حكاية تمبس كده اسمو (ادم) وبنقول ليهو ادمون
وادمون ده انا من طلعت من السودان خليتو اكبر بتاع (سنة) وطاشم اربعة وعشرين ساعة
رجعت بعد سنين طويلة لقيتو فكي تندل واصبح له سوق رائج وزوابين وقالو لي بياخد ليهو خفسة في كراكير دارفور دي وبجي نابل باجود انواع الحجابات ...
اها (ادمون) ده قابلتو وحلف وبالحاج شديد اني لازم اشتري منو حجاب ابو طبلة..؟؟
ولمن اشتريتو علي مضض اداني معاهو زي كم حجاب كده هواادة...
وحسع مادام الحجابات بقت بتجيب اقواان زي بتاعة عمر بخيت ده فضروري الاجازة الجاية امشي
افتش حجاباتي بتاعات (ادمون ) دي اكيد بكون فيها شي نافع وممكن يدينا دفرة في كراكير الخليج دي
(حتي لو حجاب رطوبة) ما بطال معانا

انور التكينة:-

Quote: ويكون جلده جديد زى الظاهر فى صورة التكينة ومطلى باللون الأحمر بتاع المراكيب.

اول النتائج الايجابية لزيارة السيد رئيس نادى الهلال
الى دارفور بدعوى القيام بالصلح بين الفلاتة و الهبانية
فى تلس .
ذواليد سليمان مصطفى:-
اول النتائج الايجابية لزيارة السيد رئيس نادى الهلال
رئيس نادي بحالوا
يبقي سياسي
ولا قلب نادي الهلال الى برلمان الهلال السياسي
الى دارفور بدعوى القيام بالصلح بين الفلاتة و الهبانية
هو ناس دارفور ناقصهم اجاويد
ما من زمان معروف المشاكل بتحصل
وبحلوها الادارات الاهلية
ماحاجة طبيعية
لكن اذا داير يدفع الديات
دي حاجة سمحة
وربنا يزيد فى حسناتو
تلس
اما حكاية تلس
حاجة تانية
عليكم الله وفى ذمتك
فى زول بمشي تلس
عشان يحل المشاكل
ليه ما قاعد فى نيالا
وقدم دعوة للطرفين
حكاية التلس دي حكاية ما حكاية
اهلنا الفلاته ما بقصروا
فى الكواديك
ناس دييييييل خطيرين عديل
بروبو الموية

معاوية المدير:-
في الصورتين الأولى والثانية
الحجاب ده ظابط في يد الراجل
ده داير يقطعها عدددديل كده،
وظاهر السير بس يعني الحجاب
معصور بين الأباط والضُلع، وسيرو
ضابي ضبّة شديدة مع العضل، يعني
ماسك قوي. وفي صورة التكينة
الحجاب ظاااااااهر وكمان أحمر
عدددديل كده. المصيبة ده إتملص
من العصرة الشديدة دي كيف وجاء
مارق من بين الأباط والضُلع؟؟؟؟؟؟؟؟؟؟؟؟؟؟؟؟؟؟؟
والله العظيم فقير الكمبيوتر ده، أظرط
من جماعة مايرنو كلهم...
الزول يدو لاحقة تب...

خالد احمد محمد:-
رايك شنو فى رمزية اللون الاحمر حق الحجاب ياذو اليد ؟؟؟؟؟ وعليك الله عرج لينا شوية وناقش لينا موضوع روحانية الكرة السودانية ومحاولة عمل اجتماع عاجل لكل ( والله ماعرفت جمع فكى شنو المهم ختها من عندك ) اجتماع عاجل لكل ( جمع فكى ) حايم فى السودان واستنهاضهم فى سبيل النهوض بالكرة السودانية ووضعها فى المكان اللائق بها كمؤسس للاتحاد الافريقى ... وجزاكم الله خير الجزاء

ذواليد سليمان مصطفى:-
اللون الاحمر حق الحجاب
اللون الاحمر
بكون
الجن
لان الجن بحب الدم واللون الاحمر
اما جمع فكي انا ذاتو ما عارف
ممكن الاديب حمور زيادة يدينا معناها
او جمع فقراء
الله يسترنا من الهلال
جنهم كواريك
وهضربة
خليهم يكوركو زي ما عائزين
ونواصل الحملة الصورية
ضد عمر بخيت
فى جماعة قالوا
كمون عشان يحفظو من العين
واخرين قالو
ماليها اثر
وكثير من الانتقادات
الحاجة الطبعية ما كل فكي عندو طلاميس
وكجور
وقد يكون بتاع عمر بخيت احدث موديل
ولكن الدقسة حصلت
انظروا الصورة


Gaafar Ismail:-
ذو اليد
شكيتك على محمد عادل

محمد عادل:-
حسه لو فتشتك ماحلقى حجاب

ذواليد سليمان مصطفى:-
: حسه لو فتشتك ماحلقى حجاب
والله حيرتونا يا هلالاب
فى امرك
كل ما نقول الحجاب
تقولو لو فتشتك ما حلقى حجاب
لكن يا محمد عادل
الفضحية عملتوه براكم
ونشرتو الصورة فى حبيب البلد

الفضحية خلوها مستورة
لحدي ما نجيب صورة الفكى
الكتب الحجاب
وكمان فاطرين فى الفتحاب
مع اشهر الشيوخ

جمال الوالي: الجهاز الفني الاجنبي الجديد سيصل خلال ساعات ووارغو باق بالمريخ


تحدث السيد جمال الوالي رئيس نادي المريخ ظهر امس للاذاعة الرياضية حول الشان المريخي بعد تداعيات خروج الفريق من مسابقة الاندية الافريقية وابتدر الوالي حديثه عن مباراة فريقه امام شقيقه الهلال والتي خسرها الفريق بثلاثة اهداف مقابل هدف بانها امتداد للتراجع الذي حدث للفريق منذ بداية الموسم وسوء الطالع الذي يلازم اللاعبين والمريخ كاد ان يفقد البطولة في ادوارها الاولي امام فريق اتراكو الرواندي فهذه هي كرة القدم تقوم علي جملة من الاشياء مثل التنظيم الاداري واللاعبين حيث كانت لنا جملة من الاخفاقات واعتقد ان المريخ عاني من سوء الاعداد وعدم الاستقرار التدريبي واشكالات في القطاعات المساعدة وحتي سوء الطالع لازمنا في بطولة سيكافا التي احتضنها المريخ والتي كانت بطلب من القطاع الرياضي بقيادة ابو جريشة والجهاز الفني بقيادة رادان حيث امنوا علي قيام هذه البطولة بحيث ان يلعب الفريق ستة مباريات تنافسية تكون خير سند للفريق في دوري المجموعات ولكن المردود الفني وشكل الفريق في بطولة سيكافا لم يكن مقنعا للانصار وكما هو معلوم بان هذه البطولة لم يشارك فيها عدد كبير من لاعبي المريخ بداعي الاصابة ولكن يبقي المريخ قد خرج من دوري المجموعات وليس هو الفريق الوحيد الذي خرج من البطولة فقد سبقه نادي الاهلي القاهري في وجود مدربه جوزيه رغم الاستقرار الذي يعيشه الفريق.

وتطرق رئيس نادي المريخ الي الاعلام الرياضي حيث سخر الوالي من بعض الكتاب الصحفيين مشيرا الي سهولة الكتابة والتنظير في الرياضة ولكن يبقي المحك في العمل معتبرا نفسه من جيل التغيير بحيث لا نلتفت الا للنقد البناء غير الهادم.

اما الحديث عن اقالة مازدا او استقالته فقد اجاب الوالي بانهم في ادارة المريخ عقدوا مؤتمرا صحفيا اعطوا فيه مازدا صلاحيات كبيرة لقيادة الدفة الفنية في الفريق الا ان تراجع الفريق امام زيسكو والخسارة خلقت نوعا من عدم الاستقرار في مجلس ادارة نادي المريخ والذين امنوا بعد خروج من البطولة الافريقية علي ان يتولي الفريق جهاز فني اجنبي قدير يحدد من يبقي في كشوفات الفريق للمرحلة المقبلة والان اسندت المهمة لابن النادي وعضو المجلس كابتن ابراهومة ومدرب اللياقة منصف لقيادة الفريق امام كانو بيلارز في الجولة الاخيرة من مسابقة الاندية الافريقية اما الحديث عن ان هناك مشكلة في الاشخاص من حول الوالي فيري ان الكرة ليست هي انتصارات مستمرة بل هي مجهود مبذول وتعاون بين كافة الاجهزة ونحن قادرون علي مسيرة الاصلاح واعتقد ان المسيرة الان ليست بالطموح وقد دافع الوالي عن سلوك لاعبي المريخ الاخير مشيرا الي ان توتر اللاعبين جراء الضغوط الاعلامية والادارية فهم من نالوا الممتاز وكاس السودان العام الماضي وهم من هزموا الهلال في الموسم المنصرم اضافة لذلك هنالك اصابات بالغة في الفريق مثل العجب وسفاري وطمبل وبله جابر فهؤلاء مؤثرون في تشكيلة الفريق.

وفي نهاية حديثه تقدم الوالي باعتذار لجماهير المريخ جراء الخروج من البطولة الافريقية بحيث كبر الامل في ان يحرز المريخ بطولة هذا العام ولكن هناك جملة من الظروف والاخطاء حال دون ذلك ولكن نحن اقوياء بعشقنا لهذا النادي وان لاعبي الفريق مميزون يجب ان نلتف من حولهم وهم في اشد الحاجة لنا.

وارغو باق في كشوفات المريخ الموسم القادم

ذكر السيد جمال الوالي رئيس نادي المريخ ظهر امس للاذاعة الرياضية بان نادي المريخ متمسك بلاعبه المحترف النيجيري وارغو ومازالت لديه سنتان قادمتان حسب العقد اما المحترف لاسانا فنحن لا نمانع في احترافه في اسبانيا لكن اذا تحصل المريخ علي عائد مادي جيد من الصفقة.

الجهاز الفني الجديد للمريخ يصل خلال ساعات

اكد السيد جمال الوالي رئىس نادي المريخ بان ادارة الفريق بصدد التعاقد مع طاقم اجنبي كامل لتولي الادارة الفنية في الفريق وتحديد من يبقي في الكشف من اللاعبين وان وصول الجهاز الفني خلال ساعات.

20 مليارا عائد بطولة سيكافا للمريخ

اشار السيد جمال الوالي في حديثه ظهر امس للاذاعة الرياضية بان عائد المريخ من بطولة سيكافا التي نظمها المريخ تقدر بـ 20 مليار جنيه نافيا ان يكون هناك عجز بلغ 800 مليون مؤكدا علي ان سيكافا اضافت للسودان سمعة جيدة لدي دول الجوار

مزمل خيرى:-
الفريخ مازادا.


ذو اليد
والله رمضان دا دخل العضم وفات بهناك كمان .!!!

ذواليد سليمان مصطفى:-
والله رمضان دا دخل العضم وفات بهناك كمان
كل سنة انت طيب يا مزمل
ده مش دخل العضم
فات حدو
الله يقبل الصيام والقيام

حمد فتح الرحمن:-
ايوااا
يعني شلباية داك كان لابس ليه سبعة حجبات كدا
و سكواها داك اظنو لابس ليه اتنين
ناس الصفقاصي اربعة حجبات و في نيجيريا كم كدا ما عارف
ياخ انتو في خمسة مباريات دولية في السنتين ديل بس شباكم شايلا ليها عشرين قون اي و الله معدل كل كورة اربعة اقوان ، عفوا اربعة حجبات ، انا لله
كدي خلينا نحسبا معاك
قول معاي
1 - الصفاقصي اربعة حجبات
2 - الوحدات سبعة حجبات
3 - كانو تلاتة حجبات
4 - زيسكو تلاتة حجبات
5 - الهلال تلاتة حجبات
يلا تعال نحسب 4 + 7 + 3 + 3 + 3 = كم حجاب ؟
طبعا الحجبات دي قابلا للزيادة في المباراة السادسة بنفس المعدل يعني نتوقع مباراة الفلاتة الجاية دي تاخدو ليكم اربعة حجبات على اللباد و تطلبوا الله و تفارقو دوري الكبار ا تاني لو كتبو ليكم بي روشتة ما تجو تعلبو مع الكبار
يلا بلا لمة ملشطة و ...

طلحة عبدالله:-
يعني بي كلامك دا يا ذو اليد اخوي الهلال دا بجي ماشي في بطولة افريقيا دي
زي الترتيب وبعد مايجلد نس مازمبي وغيرو و يشيل كاسا بمش ابو ظبي عشان يطقش
ناس ميتسي واخوانه الكاتلونيين بالتلاتات والاربعات ويشيل كاس العالم وبعد كدا
يعلن اعتزال اللعب في الدوري السوداني بحجة انو ما مستواهو .
غايتو لو تسمع كلامي المريخ دا غلب نفسو بي نفسو وطالما ما عندو مجلس ادارة مسلف عقلو
وقلبو للصحافة الرياضية ح يستمر بحالتو الحزينة دي وح تستمروا انتو مشجعينو تتحفونا
ذات كل يوم بي جنس الاساطير الفوق دي.

على محمد على بشير:-
Quote: لن نبخس الهلالاب انتصارهم
لعب الهلال فاجاد واستحق النصر
ولم نقدم مايشفع لنا
فحلال لهم الاحتفاء بنصرهم
وعلينا ان نحاول ترتيب اوراقنا
ولندعهم يحتفلون

محمد عبد الماجد الصايم:-
كبســور البــورد!

احمد التجانى احمد:-
: الحمد لله حمدا كثيرا

معقداني من زمان قصة انو محمد عادل هلالابي وكنت بتصبر شوية بإنو عمار آدم بوزن المعادلة بهناك
و اتجرست عديل لما عمار اعلن انسحابو
لكن الله دا ما كريم
رزقنا بي وصيفابي يعادل محمد عادل و عمار و آخرين مجتمعين

قوي يا ذا اليد والله
كيب إت أب



والله ما ح اقدر اعبر عن نفسى احسن من كدة
شكرا ود البشرى
الا بازيد ان ذوذو دة قدانا بتأنيث
المذكر وتذكير المؤنث
وكمان منتشر لمذيد من القد

نادر الفضلى:-
اليهود لا يقاتلون إلا من وراء جدر محصنة
والرشالشات لا يقاتلون إلا من وراء حجاب و حكام!
والشوت من وراء حجاب . ما بتشاف
المسكين حافظ ما شاف الكورة الشايتنها من وراء حجاب
و خايف يتكلم .. يقولوا بتعذر ساكت أو نظرو ضعيف و يلزمو الكنب!
وإبطال الحجاب و السحر .. و التغلب على التحكيم ... يكون
بفريق قوى ، تشكيلة سليمة ، و خطة أسلم ، و تدريب عالى و إدارة ذكية للمباراة
وهذا ما إفتقده المريخ .. فكانت المسببات لسريان مفعول السحر و الحجاب و الحكام!

dardiri satti:-
يا أستاذ!!
والله دي كارثة!!
ماجستير في حوار الحضارات ،
وتؤمن بالفقراء والأناطين ؟؟
هل تؤمن ياخي إن الهلال ، أو أي فريق ،
يمكن أن ينتصر بالفقرا؟
هل كنت من الذين اقترحوا حل مشكلات
السودان الإقتصادية بالإستعانة بالجن؟؟
دي كارثة.
ماجستير في حوار الحضارات
هارون دياب ،
تحياتي
Quote:
لن نبخس الهلالاب انتصارهم
لعب الهلال فاجاد واستحق النصر
ولم نقدم مايشفع لنا
فحلال لهم الاحتفاء بنصرهم
وعلينا ان نحاول ترتيب اوراقنا
ولندعهم يحتفلون .
كل الود
نحياتي

محمد البشرى الخضر:-
Quote: بفريق قوى ، تشكيلة سليمة ، و خطة أسلم ، و تدريب عالى و إدارة ذكية للمباراة
وهذا ما إفتقده المريخ ..
أضف كمان صحافة واقعية لا تخدر الفريق و جمهوره و تقدم النقد البناء و تضع يدها عل الجرح و تقترح الحلول
إذا كان المريخ افتقد ما ورد اعلاه يبقى ما محتاج حجاب عشان ينهزم
يكفي اي حداشر بعرفوا يلعبوا كورة يكون فيهم اتنين تلاتة بشوتوا من برة وواحد بلعب هيد كويس
ودا الحصل


nazar hussien:-
يعني بي كلامك دا يا ذو اليد اخوي الهلال دا بجي ماشي في بطولة افريقيا دي
زي الترتيب وبعد مايجلد نس مازمبي وغيرو و يشيل كاسا بمش ابو ظبي عشان يطقش
ناس ميتسي واخوانه الكاتلونيين بالتلاتات والاربعات ويشيل كاس العالم وبعد كدا
يعلن اعتزال اللعب في الدوري السوداني بحجة انو ما مستواهو .
غايتو لو تسمع كلامي المريخ دا غلب نفسو بي نفسو وطالما ما عندو مجلس ادارة مسلف عقلو
وقلبو للصحافة الرياضية ح يستمر بحالتو الحزينة دي وح تستمروا انتو مشجعينو تتحفونا
ذات كل يوم بي جنس الاساطير الفوق دي.

(رواية طلحة بن عبدالله) ...
الله يجازيك خير يا عمر بخيت...الكان وزنت لينا موجة طلحة
قال صحافة...قال

طلحة عبدالله:-

Quote: الله يجازيك خير يا عمر بخيت...الكان وزنت لينا موجة طلحة

والله يا نزار اخوى موجة طلحة موزونة شوكة وشنكار
لكن بس التشويش في البورد حاصل عشان كدا بحاول ارد البضاعة الهلالية
لاهلها وزى ما الهلالاب قاعدين يسخروا ويشتموا الزعيم المريخي قاعد اعمل
والنتيجة ان انا مستمتع بالحاصل لانو بعتبروا مناكفات ما اكتر ولا اقل ..
اقول قولي هذا
واستغفر الله لى ولكم .


ذواليد سليمان مصطفى:-
السحر والشعوذة والدجل
حرام شرعا فى حكم الله تعالى

أحمد ابراهيم عثمان:-
يلا استمتع معانا يا ريس طلحة
1/ تستمتــــــــــــــــــون
2/تطيــــــــ(برااااكم)ـــــــــــــرون
3/ تندمــــــــــــــــــون
انشاء الله دائما مستمتـــــــــــــــــــــــون

طارق الكوتش :-
: فضحية الهلال(شعوذة ودجل)ولولاه لا يكون المريخ مغلوب



Quote: السحر والشعوذة والدجل

حرام شرعا فى حكم الله تعالى

تناقضات
عجبى كيف تصفها بالدجل و الشعوذه ثم تقرر انها هى التى غلبت المريخ
اذن انت مقتنع من جهه وتقرر من جهة اخرى .... انت يا اخوى ماجستيرك
ده من يا تو جامعه ............... حسبى الله و نعم الوكيل
واستغفر الله العظيم
هنالك فرق مابين المناكفات و التجريح و اتهام الناس بالحرام
اتمنى ان تطلب من بكرى سحب هذا البوست المقرف

zoelyed
زائر


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى